ازاى ممكن نحارب الاحتلال الاسرائيلى؟

December 12, 2017 § Leave a comment

 

انا شايف اننا كأفراد ممكن نحارب الاحتلال الاسرائيلى من غير ما نمسك سلاح ومن غير ما ناخد اذن من حكومة ومن غير ما نعمل حاجة مختلفة يعنى عن اللى بنعمله يوميا ومن غير ما نخصص لها وقت ، يعنى ممكن نعملها واحنا بنعمل نشاطاتنا العادية.
1- ممكن مثلا نعمل صفحات بالعبرى بتشكك فى ثوابتهم وبتقلل منهم وبتنشر حقيقتهم ونغير ال location وال target area او ايا كان اسمها لاسرائيل زى ما فى صفحات كتير زى كدة بتوصلنا وجزء مننا للاسف بيتفاعلوا معاها زى الهبل.
2- ممكن ندعم المقاومة بفلوس (امريكا ساعدت اسرائيل ب 108$ مليار من سنة 49 ل 2006 يعنى مش عيب ولا حرام دعم المقاومة خالص) او اى نوع من المساعدات يحتاجوه عشان الوحيدين اللى يقدروا يحاربوا بسلاح ع ارض الواقع هما وبقى اشبه م المستحيل ان حد تانى يقف بصفهم.
3- متدخلش ع صفحات اسرائيلية وتعمل share او تتفاعل باى طريقة حتى لو شتيمة ، قابلتك صفحة منهم اعمل ريبورت وخلاص ايًا كان تفاعلك غير كدة فهو مصلحة ليهم.
4- ممكن نبطل نبص ع انها قضية من زمان ودلوقتى عصر التكنولوجيا وايلون ماسك هيطلع المريخ والـ Machine learning والـ Robots هتحتل الكوكب واحنا لسة بنقول الاحتلال الاسرائيلى ، دى طريقة غبية جدًا فى التفكير ممكن تهتم بالاتنين عادى جدًا جدًا ، الانسان اللى مش عايش لقضية يبقى عايش حياة ملهاش لزمة.
5- مهما كنت شايف الاحتلال الاسرائيلى منتصر وفرحان وبراءات اختراعات وكلام وبتاع ، فده اللى ظاهرلك انما الحقيقة صفارات انذار وقبة حديدية وفلوس امريكا وحكام عرب محكومين منهم غير انهم بيحاولوا يزوروا حقيقة ان دى ارض فلسطين وبيدوروا على اى كلبة تحققلهم سلام وبيطلعوا يتنططوا زى الهُبل عشان يغيظونا بس ، فمتتغرش بالمظاهر واعرف ان ممكن الحال يتقلب فى ليلة عشان فى الاول والاخر هما مش واقفين ع ارض صلبة.
6- ممكن نوعى الناس اكتر بالقضية الفلسطينية بفيديوهات انيميشن او كتب او صور او blog posts او فيديوهات عادية او اللى تعرف تعمله.
7- ممكن نقلل من التريقة على نفسنا بجمل زى ان العرب او المسلمين جهلة او ان العرب همهم ع بطنهم او الكلام اللى بقى وصمة اجتماعية علينا ده ، يعنى قبل ما تقول اصل العرب كذا افتكر انك عربى ومن الغباء انك تتريق على نفسك.
8- ممكن نشتغل اكتر وبضمير اكتر عشان لما الشغل يطلع حلو فى الاخر يبقى من عربى او مسلم والناس بتسمع للناجحين 100 مرة اكثر اهتماما ما تسمع لشخص عادى.
9- ممكن منسمحش لاى حد يسئ قدامنا بان المسلمين ارهابيين عشان دى مش حقيقة ، ومش عشان اللى عمل الجريمة الفلانية ف المكان الفلانى مسلم يبقى كل المسلمين ارهاب ع فكرة انا ممكن من بكرة اعمل account ع تويتر واسميه داعش فرع اسرائيل مثلا واحط صورة لاسرائيل واتابع الاخبار واى حادثة انزل تويتة ان انا اللى عملتها وخلصت يعنى مش حوار واخلى كام حد يعمل ريتويت لحد ما اتشهر وابقوا روحوا اتأكدوا من الاموات بقى ان مش انا اللى عملت كدة.
10- ممكن منستصغرش اللى بنعمله ايا كان انشالله صورة البروفايل الحاجات دى بتفرق خالص والله ، اصل اللى بيقول مثلا صلى او ادعى او مش عارف ايه دى كلها حاجات بتتعمل فى الخفاء ومش هتبان ع السوشيال ميديا ومش صورة البروفايل هى اللى هتتكلموا فيها يعنى ، انا اعرف ناس غيرت صورة البروفايل وانا متأكد انها بتعمل حاجات محدش م اللى بيتريق عليهم بيعمل ربعها.
11- ممكن نبطل حزننا ع اى حاجة واحباطنا الدائم باننا مهزومين وخلاص ، اه يعنى المفروض نستسلم ان كدة خلاص ونتابع كورة زى ما كنا بنتابع ولو حد جابلنا سيرة فلسطين او المسجد الاقصى نقوله يا عم خلاص بقى انت لسة فاكر ؟!!! (الفلسطينيين بيحاربوا دبابات اليهود بالحجارة من اول ما اتولدت لحد دلوقتى وميأسوش)
12- منتعصبش ع حد فى نقاش زى كدة لو اقتنع اقتنع لو مقتنعش الايام هتقنعه وساعتها ندمه هيكون اكبر من عصبيتك.
13- من يومين حصل نقل سفارة امريكا للقدس ، قبلها باسبوع كان فى مستوطنات بتتبنى ع اراضى فلسطينية يعنى اصحاب ارض بتتهجر واطفال بتتشرد واسر فلسطينية بتعيش تحت خط الفقر عشان محتل يعيش مكانهم ، قبلها باسبوع كان ناس بتتقتل ع ايد مستوطنين او جنود يهود ، قبلها باسبوع كان فى معتقلين بيتعذبوا فى سجون اليهود عشان بيدافعوا عن ارضهم ، فمش يوم او قرار هو اللى يحمسك وبعدها تكمل حياتك عادى ولا كأن حاجة حصلت ده مش تضامن يليق بالقضية.
14- اخر حاجة هسيبهالك تخيل لو قرروا يمنحوك 100 شخص ويخلوك قائد عليهم وقالولك حارب اسرائيل ايه القرارات العظيمة جدا اللى هتعملها عشان تحقق اكبر نصر باقل هزيمة؟
15- القضية قضية اسلامية بشكل خاص وقضية حق بشكل عام فاللى يهمه الاتنين هتهمه قضية فلسطين او قضية المسجد الاقصى. اللى مش هامه غير مصر فمصر مستحيل باى شكل من الاشكال تقدر تصد الحروب الجاية لوحدها لو الدول العربية انتهت بالتوالى كدة فمصر مش بعيدة ومش هتلاقى حتى عربى عنده شقة ويقدر يتعاطف بصورة بروفايل.
اما اللى معندهوش امل بقى وشايف انه مجرد اداة وحاسس ان كدة خلاص فربنا هيحاسبك لوحدك وع الاقل عيش وانت حاسس انك عملت اللى عليك.

*اللى شايفنى بقول كلام ومعترض ع حاجة بقولها يبعتلى ابعتله مصدر يأكد كلامى.

Advertisements

نشأة الـ Technology Vs نشأة الـكون

May 16, 2017 § Leave a comment

تخيل نفسك مثلا مجرد file كمبيوتر جوا كام folder جوا بعض عايشين ع حاجة زى windows مثلا شغالين ب AI – يعنى بتتحكم فى اللى بتعمله فى حدود اللى متبرمج ع اساسه – واحدة واحدة بتبدأ تعرف انك مش ف الفولدر لوحدك فى files تانية بتعرف انك مكون من شوية سطور برمجية ، بتبدأ تتعلم ازاى تروح من فولدر للتانى بتبدأ تعرف ان فى حاجة اسمها partitions محطوط جواها الفولدرات دى بتعرف ازاى تروحلها بتخمن ان فى فولدرات متعرفش تروحها بتبدأ تسأل شوية اسألة زى:

– ازاى جيت هنا ؟ فى فايلات غيرى اتمسحت وفى فايلات بتقول ان فى حاجة اسمها recovery وينفع يرجعوا بعد ما يتمسحوا ، طيب ازاى ال recovery ده بيحصل ؟ طيب انا ك file لما بتمسح بروح فين ؟ طيب فى فايلات موجودة غيرنا ومعمولها hidden واحنا مش شايفينها ؟ طيب طالما هى موجودة احنا مش شايفينها ليه ايه اللى خلاها hidden؟ فى فايلات اسمها guides بتقولنا مينفعش نخرب الهارد او الويندوز عشان فى tracking بتحصلنا ولو شافوا اننا خربنا حاجة ممكن يتعملنا glitches تضايقنا ؟ طيب ال guides دول ايه اللى خلاهم guides ؟ فى انواع من ال files اشمعنا احنا ال files اللى معمولة AI ؟ هى ال Files التانية بتفهم بعض ازاى؟

فى كمية اسئلة كبيرة وكتيرة اوى لو فضلنا ك files ندور ع اجابات ليها هنتمسح قبل ما نجاوب ع 0.0001% ومش هنقدر نعمل اللى م create يين عشان نعمله ، فى حاجات اجابتها اكبر مننا ، فى اجابات مش هنفهمها ، فى اجابات مش مطلوب مننا نعرفها م الاساس…
تخيل لو كل ده مكنش ليه documentations ومكنش معروف لينا كنت ازاى هتصدق ان الهوا ممكن يبعتلك صوت اخوك فى التليفون او شكل والدتك فى فيديو call ! كنت هتعرف تتخيل اجابة لاى سؤال م اللى فوق ؟

مش اى حاجة عجزنا عن تفكير ليها ده معناه انها مش موجودة ، مافيش صدفة تقدر تخليك تكلم صاحبك اللى بيبعد عنك 10000كم وتشوفه وتسمع صوته ، مافيش صدفة تخلى الهوا ينقل كلامى اللى بكتبه ليك !
تخيلوا دى التكنولوجيا اللى ناس زينا عملتها ، ما بالكم بالكون كله !

ذكرى استشهاد محمد الدرة

September 30, 2016 § Leave a comment

من سنتذكرهم بقلوبنا

CtmSQORW8AQkzWk.jpg

محمد الدرة 30/9/2000

ومن سنتذكر خيانتهم

giphy

 

الحقوق التى لا تموت بخطابات البائعين – القضية الفلسطينية

May 18, 2016 § Leave a comment

يعنى يبقى البيت بيتى وتيجى ناس تتحامى فى التخين وكل يوم ياخدوا اوضة وينادوا صحابهم ياخدوا اوضة تانية وفى الاخر جارى يعمل كبير بانه يصالحهم عليا وهما ياخدوا الاوض اللى قاعدين فيها وانا اخد الباقى …

يعنى احنا كعرب اكتر حاجة بتربطنا بالهوية هى فلسطين ، نقوم احنا مفرطين فى حقها بسهولة اوى قال ايه بنعمل مصالحة 👿

مش كفاية المناطق المنزوع منها السلاح والجدار العازل وعمليات الاغتيالات او الاعتقالات اللى بتحصل كل يوم للفلسطنين والمستوطنات اللى بتتبنى كل يوم ع اراضى فلسطين والمستوطنين اللى لهم الحق فى حمل السلاح ضد صحاب الارض وحاجات كتير عمرنا ما هنحسها زى اللى عايشنها ..

وبعدين اللى عاش وقت 67 عنده “احاسيس” وحشة اوى ضد اليهود وانت زى ما قولت عشت الفترة دى ومحسوب واحد من البشر ممكن عقلك يكون بعافية شوية انما اكيد عندك احاسيس راحت فين قدام نكسة بلادك والارض اللى اتسرقت ؟!

ناس بتحتفل بسرقة ارض وانتصار وناس “بتحتفل” بنكبة وانكسار ، بنحتفل بانكسار ازاى؟ مش عارف ، ما علينا سيادته جى يعمل سلام بينه وبين اللى كسرنا بدون ادنى شرف لبنى ادم ..

فى حاجات كتير بتحصل بسيطة نسبيا او يمكن فى ناس تعوض ناس ، ممكن اللى يهتم بيها اكتر مننا اصحاب قضيتهم انما لما الموضوع يوصل لتطبيع مع اليهود فمعتقدش انها حاجة بسيطة ممكن تتعدى بسهولة ..

فى النهاية احب اذكركم بالفيلم الوثائقى ده

وده خطابه ربنا يبعدنا عن شره

1000 يوم من اﻻعتقال – استاذ مصطفى كامل

April 20, 2016 § Leave a comment


5 كاميرات مكسورة – فيلم وثائقى عن المقاومة الفلسطينية

February 1, 2016 § 1 Comment

انتهيت للتو من مشاهدة الفيلم الوثائقى الرائع “5 كاميرات مكسورة” للمصور الفلسطينى عماد برناط ، بالاضافة الى اهتمامى بمجال دراستى وشغفى الا اننى اخصص وقت كل فترة لاعرف اكتر عن قضيتنا ، اقترح هذا الفيلم بشدة .

https://www.facebook.com/zeyadetman/posts/10208385209018134

المسجد الاقصى لن يقسم

September 18, 2015 § Leave a comment

اعرفوا اللى بيحصل فى المسجد الاقصى 😶

  • فى نوعين من التقسيم اللى بيحاول يعمله الكيان الصهيونى هناك :
    تقسيم زمانى : تقسيم ساعات النهار بحيث ان المسلمين يدخلوا فى اوقات الصلاة ويمنعوهم من الدخول من الساعة 7 لصلاة الظهر ، ومن وقت الفجر لصلاة الظهر يبقى المسجد الاقصى كله بساحاته مخصص لليهود بس وان اليهود ليهم الحق يدخلوا المسجد الاقصى فى كل اعيادهم (100يوم) وايام السبت يعنى 200 يوم فى السنة !
  • تقسيم مكانى : تكون الاماكن المسقوفة زى مصلى قبة الصخرة والمصلى المروانى للمسلمين ، والساحات الخارجية تحت سيطرة اليهود ويكون ليهم الحق انهم يبنوا كنيسين فى زوايا المسجد الاقصى الفاضية وعلى فكرة نظام التقسيم بدأ يتنفذ والضرب اللى بيحصل هناك بسبب كدة ..

فى بقى حاجة اسمها المرابطين ودول ناس من اهل القدس بيكونوا فى المسجد الاقصى بيشغلوه بقراءة قرآن وحلقات ذكر عشان مينفذوش نظام التقسيم ده ، ومن ايام اصدروا قانون بيعتبر المرابط ارهابى ويحاكم على هذا الاساس

متستهونش بأى حاجة ممكن تتعمل ، متستهونش بالكلمة ولا بالدعاء ولا بالتوعية ، دى صورة كيف ترابط فى المسجد الاقصى وانت بعيد ؟
COSrcGfUsAAz9UD

#المسجد_الاقصى
#لن_يقسم

يا هُبل اسمك يضحك | شعر – تميم البرغوثى

August 24, 2015 § Leave a comment

يا هُبَلْ إسمَكْ يِضَحَّكْ

برضه بعض الآلهة بتبقى سخيفةْ

مْتَبِّتَة قَوِي فِي الوَظِيفَةْ

بَسِّ رَافْضَة تِشْتَغَلْ

شُوفْ أَكْل عِيشَكْ يَا هُبَلْ

قَاعِدْ تقول اْدعونى أدِّيلكم أمانى

بس لما تيجوا تدعوا صفَّروا لاجل اْنْتِبِه وَاْفْتَح وِدَانِى

وادبحولى كام جَمَلْ

آدى الجمل وادى الحَمَلْ

يا سيِّدى اتلحلح بقى وِاْشْفِى لْنَا مَكْسُورْ أو عليلْ

أو جرَّب انصرنا على الجيش الدخيلْ

يا عمِّ دول جايين بفيلْ

طَبْ بُص، خَلِّيك اْنْتَ راكن بَسِّ قُول إيه العَمَلْ

واللى اتخَدَعْ لما اتَّبَعْ ضرب الوَدَعْ، عَايِزْ بَدِيلْ
« Read the rest of this entry »

فيلم “عمر” الفلسطينى

August 15, 2015 § Leave a comment

فيلم مهتم بالقضية الفلسطينية اقترح انك تشوفه جدًا

الفيلم حلو جدًا وقوى سواء اخراج او تمثيل ، اقرب للافلام الوثائقية وعرف يوصل اللى هو عايزه …
انما على المستوى الفلسطينى فهو مهتمش بإبراز الشخصية الفلسطينية اللى الناس بتعرف الفلسطينين بيها ، ولا عرض حاجات كتير من اللى بيستناها المشاهد ، كمان الالفاظ مكنش ليها لزمة وممكن نسامح المخرج عشان ده فيلم واقعى وطبيعية الكلام بتزود واقعيته !!
الفيلم رومانسى سياسى اكشن تشويقىدرامى برضو 🙂

ضع بصمتك ع الانترنت .. باللغة العربية

August 6, 2015 § Leave a comment

لن اناقش فى هذه المقالة حالة المحتوى العربى او اللغة العربية على الانترنت سواء من الناحية الاحصائية او من نواحى اخرى ، ولن اذكر ايًا من تلك الارقام المخيفة التى من الممكن ان تتعرض لها اللغة العربية فى الايام القادمة اذا اصررنا ان يكون الوضع كما هو دون تغيير ، ولكنى سأعرض فى هذه المقالة كيف لك كشخص عادى اثراء المحتوى العربى بناء على اهدافك ومهاراتك ، ولكن قبل ذلك سأوضح لك مقابل وقتك الذى ستقضيه مقابل اثراءك للمحتوى العربى ..

اسباب ستدفعك لان تبدأ رحلة اثراء المحتوى العربى :-

توثيق مهاراتك على الانترنت وتعريفها للعالم مما قد يزيد احتمالية حصولك على وظيفة .
فانت عندما تنشر معلومة تبين انك متمكن من هذه المهاراة هذا سيعرف من حولك انك رائع مما قد يزيد فرصتك فى الحصول على عمل كما انه سيفتح النقاش بينك وبين المهتمين بنفس مهاراتك مما قد يعرفك على معلومات جديدة لم تكن تعرفها من قبل .

*زكاة العلم نشره .

فانت عندما تنشر علمًا تعلمته فهذا فى مرتبة الزكاة وهذا حتمًا سيعود عليك بالخير .

*التفاعل مع الاشخاص الاخريين .

نشر تدوينات تعليمية ستزيد من تفاعل الاخريين معك وزيادة ثقتهم بك ، كما سيعزز للاخرين دورك الهام فى حياتهم وانك مساعد لهم ، فحينما يعرفون شيئًا مفيدًا سيردون الجميل لك ..

لعلى ساكتفى بذكر تلك الاسباب القليلة ولكنك ستعرف الكثير عندما تبدأ باثراء المحتوى على الانترنت . ولنبدأ الان فى عرض كيف تثرى المحتوى العربى ع الانترنت او بمعنى اخر كيف توثق حياتك المهنية ومهاراتك على الانترنت ..

1- اعمل فيديو تعليمى وانشره على يوتيوب .

اذا كانت لديك مهارة معينة ولتكن مثلا الرسم ، يمكنك ان تسجل فيديو لك وانت ترسم وتنشره على يوتيوب وتبدأ مشاركته مع اصدقاءك على مواقع التواصل الاجتماعى المختلفة ولكن لا تنسى ان تسمى الفيديو باللغة العربية .

2- دوّن .

اذا كنت من محبى الكتابة فالطريقة الافضل لذلك هى ان تقوم بانشاء مدونتك الخاصة وهناك العديد من قصص النجاحات لمدونات شخصية او غير شخصية تعمل على اثراء المحتوى العربى ع الانترنت مثال على ذلك اراجيك او ساسة بوست مثلا ،او ان تنشر فى احدى المواقع المهتمة وتبدأ تنشر ما لديك ، هذا سيزيد من قدرتك على الكتابة ويعزز من شخصيتك على الانترنت ، كما يمكنك استخدام التدوين المصغر او التدوينات القصيرة يمكنك ان تنشر بالعربية .

3- استخدم اللغة العربية فى الكتابة والتعبير .

لعل من اهم الاسباب التى تقلل من جودة المحتوى العربى على الانترنت ان المتحدثين باللغة العربية يتحدثوا لغات اخرى سواء فى الكتابة او المراسلات على الانترنت ، مما قد يضعف اللغة عند المتحدث بها ويقلل ايضًا من شأنها ، لذلك ادعوك ان تهتم بها وتبدأ باستخدام اللغة العربية فى الكتابة .

4- ترجم المقالات المفيدة .

من اهم الطرق التى يمكن بها ان نثرى اللغة العربية هى الترجمة فترجمتنا للنصوص والمقالات العلمية او المعرفية او الانسانية او مهما كانت العلوم الى اللغة العربية ، يزيد من المحتوى العربى ويزيد من امكانية قرائتها للمستخدم العربى ، هذا سيسهل عليه موضوع القراءة وسيجعله يعرف اكثر .

5- دعم ويكيبديا العربية او ويكى هاو العربية .

ايضًا يمكنك ايضًا دعم المحتوى العربى على الموسوعة الحرة ويكيبديا فالمحتوى العربى عليها قليل بشكل مبالغ فيه حيث يوجد بها 350000 مقالة عربية فقط ومعظمهم مقالات ضعيفة ركيكة لا تحتوى على معلومات كثيرة ومنهم من يحتوى على مصادر فقط هذا وتنتشر بها الاخطاء الاملائية هذا اذا ما قمنا بمقارنة المحتوى العربى باللغات الاخرى ، اما بالنسبة لموقع ويكى هاو فقد تم دعم العربية على الموقع منذ شهور قليلة !

6- توقف عن القص واللصق واستخدام المصادر الغير معروفة .

فهذا يضعف المحتوى العربى ويقلل من الثقة به ، ويؤثر على الجودة المطلوبة ان تظهر على الانترنت .

اخيرًا ايًا ما كان دورك سواء كنت مصمم او مبرمج او طالب او عالم .. الخ يمكنك ان تضع بصمتك على الانترنت ولكن لا تنسى ان تضعها باللغة العربية

Where Am I?

You are currently browsing the انا عربى category at Orange Notes.

%d bloggers like this: